ಈ ಗಾದೆ ಮಾತು ನೀವು ಕೇಳಿಯೇ ಇರ್ತೀರಿ. ಅಥವಾ ಸಂದರ್ಭ ಬಂದಾಗ ನಿಮ್ಮ ಬಾಯಿಯಿಂದಲೇ ಆ ಮಾತು ಹೊರ ಬಂದಿರುತ್ತದೆ. ಆದರೆ ಊರಿಗೆ ಒಬ್ಬ ಯಡವಟ್ಟ ಮಾತ್ರ ಎಲ್ಲಿ ಇರುತ್ತಾನೆ? ಊರಿಗೆ ಒಬ್ಬಳೇ ಪದ್ಮಾವತಿ ಇರಬಹುದು ಆದರೆ ಯಡವಟ್ಟರು ಮಾತ್ರ ಬೇಕಾದಷ್ಟು ಸಿಗುತ್ತಾರೆ. ಹೆಚ್ಚು ಕಡಿಮೆ ಮನೆಗೆ ಒಬ್ಬರಂತೆ.
ಬೇರೆಯವರಿಗೆ ಯಡವಟ್ಟ ಎಂದು ಕರೆಯುವ ಮುನ್ನ ನಾವು ಹೇಗೆ ಎನ್ನುವ ಅರಿವು ನಮಗಿರಬೇಕಲ್ಲವೇ? ಮೊದ ಮೊದಲಿಗೆ ನಾನೇ ಯಡವಟ್ಟ ಎಂದುಕೊಂಡಿದ್ದೆ. ಆದರೆ ಸಾಕಷ್ಟು ಜನರನ್ನು ನೋಡಿದ ಮೇಲೆ, ಹಲವಾರು ದೊಡ್ಡ ಯಡವಟ್ಟರನ್ನು ಎದುರಿಸಿದ ಮೇಲೆ ನನ್ನ ಅಭಿಪ್ರಾಯ ಬದಲಾಗಿದೆ.
ಕುಟುಂಬದವರೆಲ್ಲ ಒಂದು ತರಹ ವಿಚಾರ ಮಾಡಿದರೆ ಅವರೊಳಗೆ ಒಬ್ಬ ಮಾತ್ರ ಬೇರೆಯದೇ ಲೋಕದಲ್ಲಿದ್ದು ಯಡವಟ್ಟ ಎನಿಸಿಕೊಳ್ಳುತ್ತಾನೆ. ಅವನಿಗೆ (ಅಥವಾ ಅವಳಿಗೆ) ಉಳಿದವರ ನೋವು, ಸಂಕಟ, ಹೆದರಿಕೆಗಳು ಅರ್ಥವಾಗದೇ ಹೋಗಿಬಿಡುತ್ತವೆ. ಮನೆ ತುಂಬಾ ದುಡಿಯುವವರ ನಡುವೆ ಖಾಲಿ ಕುಳಿತಿಕೊಳ್ಳುವ ಒಬ್ಬನಿಗೆ ಯಡವಟ್ಟ ಎನ್ನುವ ಹಣೆ ಪಟ್ಟ ಅಂಟಿಯೇ ಬಿಡುತ್ತದೆ. ಎಲ್ಲ ಯಡವಟ್ಟರು ಕೆಲಸಕ್ಕೆ ಬಾರದವರು ಎಂದೇನಿಲ್ಲ. ಎಷ್ಟೊಂದು ಸಲ ಹೊಸ ದಾರಿಯನ್ನು ಹುಡುಕುವುವವರೇ ಈ ಯಡವಟ್ಟರು. ಆದರೆ ಅಂತಹ ಯಡವಟ್ಟರು ನೂರಿಗೆ ಒಬ್ಬರು ಆದರೆ ಉಳಿದ ತೊಂಭತ್ತೊಂಭತ್ತು ಯಡವಟ್ಟರು ಅವರ ಕುಟುಂಬಗಳಿಗೆ ತಲೆನೋವಾಗಿಬಿಡುತ್ತಾರೆ.
ಇಷ್ಟಕ್ಕೂ ಯಡವಟ್ಟರು ಯಾರಿಗೂ ಅರ್ಥ ಆಗಲು ಸಾಧ್ಯ ಇಲ್ಲ ಎಂದೇನಿಲ್ಲ. ಬೇರೆ ಮನೆಗಳಲ್ಲಿನ ಯಡವಟ್ಟರು ತುಂಬಾ ಸುಲಭವಾಗಿ ನಮಗೆ ಅರ್ಥ ಆಗುತ್ತಾರೆ. ಏಕೆಂದರೆ ಅಲ್ಲಿ ನಮಗೆ ಯಾವುದೇ ಭಾವನೆಗಳಿಲ್ಲ. ಆದರೆ ನಮ್ಮ ಮನೆಯಲ್ಲಿನ ಯಡವಟ್ಟರನ್ನು ಗಮನಿಸಿದರೆ ನಮಗೆ ಅವರು ಅರ್ಥ ಆಗುವುದಕ್ಕಿಂತ ಹೆಚ್ಚು ನೋವೇ ಆಗುತ್ತದೆ. ಹಾಗಾಗಿ ಈ ಯಡವಟ್ಟರಿಗೆ ಸ್ವಲ್ಪವಾದರೂ ಸರಿ ದಾರಿಗೆ ತರಬೇಕೆಂದರೆ ನಮ್ಮ ಮನೆಯೊಳಗಿನ ಮಂದಿ ಉಪಯೋಗಕ್ಕೆ ಬರುವುದಿಲ್ಲ. ಅದಕ್ಕೆ ಹೊರಗಿನವರೇ ಆಗಬೇಕು. ಅಲ್ಲದೇ ಯಡವಟ್ಟರ ಸಂಪೂರ್ಣ ಬೇಕು-ಬೇಡಗಳನ್ನು ನಾವು ಗಮನಿಸಿಕೊಳ್ಳುವುದು ಬಿಟ್ಟರೆ ವಾಸ್ತವ ಲೋಕ ಅವರ ಧಿಮಾಕನ್ನು ಸ್ವಲ್ಪ ಮಟ್ಟಿಗಾದರೂ ಕಡಿಮೆ ಮಾಡಿಸುತ್ತದೆ.
ಮನೆಗೆ ಒಬ್ಬ ಯಡವಟ್ಟ ಇದ್ದರೆ ಹೇಗೋ ಸುಧಾರಿಸಿಕೊಂಡು ಹೋಗಬಹುದು. ಆದರೆ ನಾಲ್ಕಾರು ಯಡವಟ್ಟರ ನಡುವೆ ನೀವು ಒಬ್ಬರೇ ಸಿಕ್ಕಿ ಹಾಕಿಕೊಂಡರೆ? ಅಲ್ಲಿಂದ ಜಾರಿಕೊಳ್ಳಬಹುದು. ಇಲ್ಲವೇ ಅವರ ನಡುವೆ ಸಿಕ್ಕಿ ಒದ್ದಾಡಬಹುದು. ಒಟ್ಟಿನಲ್ಲಿ ಈ ಯಡವಟ್ಟರು ನಮಗೆ ಜೀವನದ ಇತಿ-ಮಿತಿಗಳನ್ನು ತೋರಿಸಿಕೊಡುತ್ತಾರೆ. ಸಂಪೂರ್ಣ ಆನಂದಮಯ ಜೀವನಕ್ಕಿಂತ ಮನೆಯಲ್ಲೊಬ್ಬರು ಯಡವಟ್ಟ ಇರುವುದು ಆ ದೃಷ್ಟಿಯಿಂದ ಒಳ್ಳೆಯದೇನೋ?
No comments:
Post a Comment